aur hī kahīñ Thahre aur hī kahīñ pahuñche
jis jagah pahuñchnā thā ham vahāñ nahīñ pahuñche

hijr kī masāfat meñ saath tū rahā har dam
duur ho ga.e tujh se jab tire qarīñ pahuñche

tā.er-e-talab kī hai har uḌaan us dar tak
nā-murād dil kā har rāsta vahīñ pahuñche

ruḳh kare idhar kā hī har azaab duniyā kā
āsmāñ se jo utre vo balā yahīñ pahuñche

har dil o nazar meñ ho ik nikhār sā paidā
bad-gumān zehnoñ tak nemat-e-yaqīñ pahuñche

aur hi kahin Thahre aur hi kahin pahunche
jis jagah pahunchna tha hum wahan nahin pahunche

hijr ki masafat mein sath tu raha har dam
dur ho gae tujh se jab tere qarin pahunche

taer-e-talab ki hai har uDan us dar tak
na-murad dil ka har rasta wahin pahunche

ruKH kare idhar ka hi har azab duniya ka
aasman se jo utre wo bala yahin pahunche

har dil o nazar mein ho ek nikhaar sa paida
bad-guman zehnon tak nemat-e-yaqin pahunche