haif baa.is tire itaab kā maiñ
kyā karūñ apne iztirāb kā maiñ

terī āñkhoñ ke aa.ine meñ rahūñ
aks ban jā.ūñ tere ḳhvāb kā maiñ

rabt meñ bhī hisāb un kā maiñ
aur qaa.il huuñ be-hisāb kā maiñ

aur kab tak rahūñ maiñ misl-e-savāl
muntazir aap ke javāb kā maiñ

sard-mehrī kā hai lihāf un par
aur paikar huuñ iztirāb kā maiñ

jo mohabbat ke naam hai mansūb
ik varaq huuñ usī kitāb kā maiñ

mujtanib mere iltifāt se vo
taḳhta-e-mashq ijtināb kā maiñ

kyā karūñ aa.ina hai mere paas
varna dushman nahīñ janāb kā maiñ

kyoñ añdhere ḳhilāf haiñ mere
kaun lagtā huuñ āftāb kā maiñ

matn rūdād-e-ishq kā 'rāġhib'
yā ḳhulāsa junūñ ke baab kā maiñ

haif bais tere itab ka main
kya karun apne iztirab ka main

teri aankhon ke aaine mein rahun
aks ban jaun tere KHwab ka main

rabt mein bhi hisab un ka main
aur qail hun be-hisab ka main

aur kab tak rahun main misl-e-sawal
muntazir aap ke jawab ka main

sard-mehri ka hai lihaf un par
aur paikar hun iztirab ka main

jo mohabbat ke nam hai mansub
ek waraq hun usi kitab ka main

mujtanib mere iltifat se wo
taKHta-e-mashq ijtinab ka main

kya karun aaina hai mere pas
warna dushman nahin janab ka main

kyon andhere KHilaf hain mere
kaun lagta hun aaftab ka main

matn rudad-e-ishq ka 'raghib'
ya KHulasa junun ke bab ka main