apnā saarā bojh zamīñ par pheñk diyā
tujh ko ḳhat likkhā aur likh kar pheñk diyā

ḳhud ko sākin dekhā Thahre paanī meñ
jaane kyā kuchh soch ke patthar pheñk diyā

dīvāreñ kyuuñ ḳhālī ḳhālī lagtī haiñ
kis ne sab kuchh ghar se bāhar pheñk diyā

maiñ to apnā jism sukhāne niklā thā
bārish ne phir mujh pe samundar pheñk diyā

vo kaisā thā us ko kahāñ par dekhā thā
apnī āñkhoñ ne har manzar pheñk diyā

apna sara bojh zamin par phenk diya
tujh ko KHat likkha aur likh kar phenk diya

KHud ko sakin dekha Thahre pani mein
jaane kya kuchh soch ke patthar phenk diya

diwaren kyun KHali KHali lagti hain
kis ne sab kuchh ghar se bahar phenk diya

main to apna jism sukhane nikla tha
barish ne phir mujh pe samundar phenk diya

wo kaisa tha us ko kahan par dekha tha
apni aankhon ne har manzar phenk diya

Source: Funoon(Jadeed Ghazal Number: Volume-002)