is tarah soī haiñ āñkheñ jāgte sapnoñ ke saath
ḳhvāhisheñ lipTī hoñ jaise band darvāzoñ ke saath

rāt-bhar hotā rahā hai us ke aane kā gumāñ
aise Takrātī rahī ThanDī havā pardoñ ke saath

ek lamhe kā ta.alluq umr bhar kā rog hai
dauḌte phirte rahoge bhāgte lamhoñ ke saath

maiñ use āvāz de kar bhī bulā saktā na thā
is tarah TuuTe zabāñ ke rābte lafzoñ ke saath

ek sannāTā hai phir bhī har taraf ik shor hai
kitne chehre aañkh meñ phaile haiñ āvāzoñ ke saath

jānī-pahchānī haiñ bāteñ jāne-būjhe naqsh haiñ
phir bhī miltā hai vo sab se muḳhtalif chehroñ ke saath

dil dhaḌaktā hī nahīñ hai us ko pā kar bhī 'nasīm'
kis qadar mānūs hai ye nit-na.e sadmoñ ke saath

is tarah soi hain aankhen jagte sapnon ke sath
KHwahishen lipTi hon jaise band darwazon ke sath

raat-bhar hota raha hai us ke aane ka guman
aise Takraati rahi ThanDi hawa pardon ke sath

ek lamhe ka talluq umr bhar ka rog hai
dauDte phirte rahoge bhagte lamhon ke sath

main use aawaz de kar bhi bula sakta na tha
is tarah TuTe zaban ke rabte lafzon ke sath

ek sannaTa hai phir bhi har taraf ek shor hai
kitne chehre aankh mein phaile hain aawazon ke sath

jaani-pahchani hain baaten jaane-bujhe naqsh hain
phir bhi milta hai wo sab se muKHtalif chehron ke sath

dil dhaDakta hi nahin hai us ko pa kar bhi 'nasim'
kis qadar manus hai ye nit-nae sadmon ke sath

Source: Funoon(Jadeed Ghazal Number: Volume-002)