sab se behtar hai ki mujh par mehrbāñ koī na ho
ham-nashīñ koī na ho aur rāz-dāñ koī na ho

mariye is hasrat meñ gar qātil na haath aave kahīñ
roiye apne pe ḳhud gar nauha-ḳhvāñ koī na ho

biich meñ hai mere us ke tū hī ai āh-e-hazīñ
sulh kyūñkar hove jab tak darmiyāñ koī na ho

shikva kis se kījiye ḳhāliq kī marzī hai yahī
nukta-chīñ paidā hoñ lākhoñ nukta-dāñ koī na ho

mujh talak qātil to qātil maut bhī aatī nahīñ
kis ko diije jaan jab ḳhvāhān-e-jāñ koī na ho

maane gar koī nasīhat 'ārif'-e-dil-ḳhasta kī
bhuul kar bhī vāla-e-ātish-bajāñ koī na ho

sab se behtar hai ki mujh par mehrban koi na ho
ham-nashin koi na ho aur raaz-dan koi na ho

mariye is hasrat mein gar qatil na hath aawe kahin
roiye apne pe KHud gar nauha-KHwan koi na ho

bich mein hai mere us ke tu hi ai aah-e-hazin
sulh kyunkar howe jab tak darmiyan koi na ho

shikwa kis se kijiye KHaliq ki marzi hai yahi
nukta-chin paida hon lakhon nukta-dan koi na ho

mujh talak qatil to qatil maut bhi aati nahin
kis ko dije jaan jab KHwahan-e-jaan koi na ho

mane gar koi nasihat 'arif'-e-dil-KHasta ki
bhul kar bhi wala-e-atish-bajaan koi na ho