koī an-honā vāqi.a nahīñ hai
ishq mere liye nayā nahīñ hai

tujh ko har baat kā pata nahīñ hai
tū mirā ishq hai ḳhudā nahīñ hai

yuuñ nishāne na taak taak ke maar
ek hī dil hai dūsrā nahīñ hai

ye jo ham roz lafz bunte haiñ
mas.ala hai ye mashġhala nahīñ hai

toḌtā hai hudūn-e-kaun-o-makāñ
dard kā koī dā.era nahīñ hai

do kināre haiñ ek maiñ ik tū
aur kināroñ meñ fāsla nahīñ hai

koī iz.hār kī sabīl nahīñ
aag hī aag hai havā nahīñ hai

ye jo tum maut se Darāte ho
zindagī sab kā mas.ala nahīñ hai

koi an-hona waqia nahin hai
ishq mere liye naya nahin hai

tujh ko har baat ka pata nahin hai
tu mera ishq hai KHuda nahin hai

yun nishane na tak tak ke mar
ek hi dil hai dusra nahin hai

ye jo hum roz lafz bunte hain
masala hai ye mashghala nahin hai

toDta hai hudun-e-kaun-o-makan
dard ka koi daera nahin hai

do kinare hain ek main ek tu
aur kinaron mein fasla nahin hai

koi izhaar ki sabil nahin
aag hi aag hai hawa nahin hai

ye jo tum maut se Daraate ho
zindagi sab ka masala nahin hai