kuchh bhī nahīñ kahīñ nahīñ ḳhvāb ke iḳhtiyār meñ
raat guzār dī ga.ī sub.h ke intizār meñ

bāb-e-atā ke sāmne ahl-e-kamāl kā hujūm
jin ko thā sar-kashī pe naaz vo bhī isī qatār meñ

jaise fasād-e-ḳhūn se jild-e-badan pe dāġh-e-bars
dil kī siyāhiyāñ bhī haiñ dāman-e-dāġh-dār meñ

vaqt kī Thokaroñ meñ hai uqdā-kushā.iyoñ ko zo.am
kaisī ulajh rahī hai Dor nāḳhun-e-hoshyār meñ

aa.egā aa.egā vo din ho ke rahegā sab hisāb
vaqt bhī intizār meñ ḳhalq bhī intizār meñ

jaisī lagī thī dil meñ aag vaisī ġhazal banī nahīñ
lafz Thahar nahīñ sake dard kī tez dhaar meñ

kuchh bhi nahin kahin nahin KHwab ke iKHtiyar mein
raat guzar di gai subh ke intizar mein

bab-e-ata ke samne ahl-e-kamal ka hujum
jin ko tha sar-kashi pe naz wo bhi isi qatar mein

jaise fasad-e-KHun se jild-e-badan pe dagh-e-bars
dil ki siyahiyan bhi hain daman-e-dagh-dar mein

waqt ki Thokaron mein hai uqda-kushaiyon ko zoam
kaisi ulajh rahi hai Dor naKHun-e-hoshyar mein

aaega aaega wo din ho ke rahega sab hisab
waqt bhi intizar mein KHalq bhi intizar mein

jaisi lagi thi dil mein aag waisi ghazal bani nahin
lafz Thahar nahin sake dard ki tez dhaar mein

RECITATIONS Nomaan Shauque



00:00/00:00 kuchh bhi nahin kahin nahin KHwab ke iKHtiyar mein Nomaan Shauque