ḳhauf ke sail-e-musalsal se nikāle mujhe koī
maiñ payambar to nahīñ huuñ ki bachā le mujhe koī

apnī duniyā ke mah-o-mehr sameTe sar-e-shām
kar gayā jāda-e-fardā ke havāle mujhe koī

itnī der aur tavaqquf ki ye āñkheñ bujh jaa.eñ
kisī be-nūr ḳharābe meñ ujāle mujhe koī

kis ko fursat hai ki ta.amīr kare az-sar-e-nau
ḳhāna-e-ḳhvāb ke malbe se nikāle mujhe koī

ab kahīñ jā ke sameTī hai umīdoñ kī bisāt
varna ik umr kī zid thī ki sambhāle mujhe koī

kyā ajab ḳhema-e-jāñ terī tanābeñ kaT jaa.eñ
is se pahle ki havāoñ meñ uchhāle mujhe koī

kaisī ḳhvāhish thī ki socho to hañsī aatī hai
jaise maiñ chāhūñ usī tarah banā le mujhe koī

terī marzī mirī taqdīr ki tanhā rah jā.ūñ
magar ik aas to de pālne vaale mujhe koī

KHauf ke sail-e-musalsal se nikale mujhe koi
main payambar to nahin hun ki bacha le mujhe koi

apni duniya ke mah-o-mehr sameTe sar-e-sham
kar gaya jada-e-farda ke hawale mujhe koi

itni der aur tawaqquf ki ye aankhen bujh jaen
kisi be-nur KHarabe mein ujale mujhe koi

kis ko fursat hai ki tamir kare az-sar-e-nau
KHana-e-KHwab ke malbe se nikale mujhe koi

ab kahin ja ke sameTi hai umidon ki bisat
warna ek umr ki zid thi ki sambhaale mujhe koi

kya ajab KHema-e-jaan teri tanaben kaT jaen
is se pahle ki hawaon mein uchhaale mujhe koi

kaisi KHwahish thi ki socho to hansi aati hai
jaise main chahun usi tarah bana le mujhe koi

teri marzi meri taqdir ki tanha rah jaun
magar ek aas to de palne wale mujhe koi