bastī bhī samundar bhī bayābāñ bhī mirā hai
āñkheñ bhī mirī ḳhvāb-e-pareshāñ bhī mirā hai

jo Dūbtī jaatī hai vo kashtī bhī hai merī
jo TūTtā jaatā hai vo paimāñ bhī mirā hai

jo haath uThe the vo sabhī haath the mere
jo chaak huā hai vo girebāñ bhī mirā hai

jis kī koī āvāz na pahchān na manzil
vo qāfila-e-be-sar-o-sāmāñ bhī mirā hai

vīrāna-e-maqtal pe hijāb aayā to is baar
ḳhud chīḳh paḌā maiñ ki ye unvāñ bhī mirā hai

vāraftagi-e-sub.h-e-bashārat ko ḳhabar kyā
andesha-e-sad-shām-e-ġharībāñ bhī mirā hai

maiñ vāris-e-gul huuñ ki nahīñ huuñ magar ai jaan
ḳhamyāza-e-tauhīn-e-bahārāñ bhī mirā hai

miTTī kī gavāhī se baḌī dil kī gavāhī
yuuñ ho to ye zanjīr ye zindāñ bhī mirā hai

basti bhi samundar bhi bayaban bhi mera hai
aankhen bhi meri KHwab-e-pareshan bhi mera hai

jo Dubti jati hai wo kashti bhi hai meri
jo TuTta jata hai wo paiman bhi mera hai

jo hath uThe the wo sabhi hath the mere
jo chaak hua hai wo gireban bhi mera hai

jis ki koi aawaz na pahchan na manzil
wo qafila-e-be-sar-o-saman bhi mera hai

virana-e-maqtal pe hijab aaya to is bar
KHud chiKH paDa main ki ye unwan bhi mera hai

waraftagi-e-subh-e-bashaarat ko KHabar kya
andesha-e-sad-sham-e-ghariban bhi mera hai

main waris-e-gul hun ki nahin hun magar ai jaan
KHamyaza-e-tauhin-e-bahaaran bhi mera hai

miTTi ki gawahi se baDi dil ki gawahi
yun ho to ye zanjir ye zindan bhi mera hai

RECITATIONS Iftikhar Arif



00:00/00:00 basti bhi samundar bhi bayaban bhi mera hai Iftikhar Arif