rah-e-vafā se maiñ ik gaam bhī haTā to nahīñ
lahūluhān huā huuñ magar Darā to nahīñ

nazar meñ shā.iba-e-ḳhauf kis liye aa.e
ye sail-e-jabr hujūm-e-barhana-pā to nahīñ

khiñchāv hotā hai mahsūs ḳhuuñ ke qatroñ meñ
ye rūh-e-asr kahīñ rūh-e-karbalā to nahīñ

ajab tanāv hai māhaul meñ kaheñ kis se
kahīñ pe aaj koī hādsa huā to nahīñ

laboñ pe harf-e-vafā hai to phir nigāhoñ meñ
ye ḳhauf kyuuñ ho kahīñ koī dekhtā to nahīñ

rah-e-wafa se main ek gam bhi haTa to nahin
lahuluhan hua hun magar Dara to nahin

nazar mein shaiba-e-KHauf kis liye aae
ye sail-e-jabr hujum-e-barhana-pa to nahin

khinchaw hota hai mahsus KHun ke qatron mein
ye ruh-e-asr kahin ruh-e-karbala to nahin

ajab tanaw hai mahaul mein kahen kis se
kahin pe aaj koi hadsa hua to nahin

labon pe harf-e-wafa hai to phir nigahon mein
ye KHauf kyun ho kahin koi dekhta to nahin