lamha lamha phailtī jaatī hai raat
qatra qatra zahr Tapkātī hai raat

muskurā kar saath ho letā hai din
jab bhī tanhā chhoḌ kar jaatī hai raat

terī qurbat kī mulā.em dhuup ko
saath bistar par bhī le aatī hai raat

qabl is ke lauT kar aa.uuñ maiñ ghar
jism se us ke lipaT jaatī hai raat

din khaḌā hai haath meñ ḳhanjar liye
jaate jaate ye batā jaatī hai raat

lamha lamha phailti jati hai raat
qatra qatra zahr Tapkati hai raat

muskura kar sath ho leta hai din
jab bhi tanha chhoD kar jati hai raat

teri qurbat ki mulaem dhup ko
sath bistar par bhi le aati hai raat

qabl is ke lauT kar aaun main ghar
jism se us ke lipaT jati hai raat

din khaDa hai hath mein KHanjar liye
jate jate ye bata jati hai raat

Source: Book : Khushk Tahni Zard Pattay (Pg. 48) Author : Yousuf Taqi Publication : Yousuf Taqi (2003) Edition : 2003