mujhe na dekho mire jism kā dhuāñ dekho
jalā hai kaise ye ābād sā makāñ dekho

na chaaT jaa.e kaḌī dhuup surḳhiyāñ lab kī
shajar kī chhāñv kisī ghar kā sā.ebāñ dekho

mohabbatoñ kī tasallī bahut zarūrī hai
sitam ke shahr meñ ik yār-e-mehrbāñ dekho

koī bharosa nahīñ abr ke barasne kā
baḌhegī pyaas kī shiddat na āsmāñ dekho

tumhārā vaqt nahīñ sach ke bolne vaalo
na chup rahoge to kaT jā.egī zabāñ dekho

koī hasīn abhī rāste se guzrā hai
lagāo aañkh se qadmoñ ke jo nishāñ dekho

hunar to roz hī biktā hai chand sikkoñ meñ
ḳharīd le na zamāna tumheñ amaañ dekho

nahīñ hai tum meñ salīqa jo ghar banāne kā
to 'ashk' jaao parindoñ ke āshiyāñ dekho

mujhe na dekho mere jism ka dhuan dekho
jala hai kaise ye aabaad sa makan dekho

na chaT jae kaDi dhup surKHiyan lab ki
shajar ki chhanw kisi ghar ka saeban dekho

mohabbaton ki tasalli bahut zaruri hai
sitam ke shahr mein ek yar-e-mehrban dekho

koi bharosa nahin abr ke barasne ka
baDhegi pyas ki shiddat na aasman dekho

tumhaara waqt nahin sach ke bolne walo
na chup rahoge to kaT jaegi zaban dekho

koi hasin abhi raste se guzra hai
lagao aankh se qadmon ke jo nishan dekho

hunar to roz hi bikta hai chand sikkon mein
KHarid le na zamana tumhein aman dekho

nahin hai tum mein saliqa jo ghar banane ka
to 'ashk' jao parindon ke aashiyan dekho