na kū-e-yār meñ Thahrā na anjuman meñ rahā
adā-e-nāz se ye dil sarā-e-fan meñ rahā

hazāroñ tūfāñ uThā.e haiñ vaqt aane par
lahū bhī ḳhaas adā se mire badan meñ rahā

maiñ ek rañg thā rañg-e-ḳhayāl-e-āvāra
kisī dhanak meñ kisī rut ke pairahan meñ rahā

anā hī thī ki na jhukne diyā kabhī mujh ko
pahāḌ sar pe uThā kar bhī bāñkpan meñ rahā

vo maiñ hī thā ki koī aur thā nahīñ ma.alūm
tamām umr jo mere hī jaan o tan meñ rahā

safīr-e-jāñ ke liye manzileñ nahīñ hotīñ
koī paḌāv bhī aayā to vo thakan meñ rahā

uThī jo saif-e-sitam be-niyāz-e-maut-o-hayāt
qalam-ba-dast khaḌā vādī-e-suḳhan meñ rahā

na ku-e-yar mein Thahra na anjuman mein raha
ada-e-naz se ye dil sara-e-fan mein raha

hazaron tufan uThae hain waqt aane par
lahu bhi KHas ada se mere badan mein raha

main ek rang tha rang-e-KHayal-e-awara
kisi dhanak mein kisi rut ke pairahan mein raha

ana hi thi ki na jhukne diya kabhi mujh ko
pahaD sar pe uTha kar bhi bankpan mein raha

wo main hi tha ki koi aur tha nahin malum
tamam umr jo mere hi jaan o tan mein raha

safir-e-jaan ke liye manzilen nahin hotin
koi paDaw bhi aaya to wo thakan mein raha

uThi jo saif-e-sitam be-niyaz-e-maut-o-hayat
qalam-ba-dast khaDa wadi-e-suKHan mein raha