dil vahī ashk-bār rahtā hai
ġham se jo ham-kanār rahtā hai

maiñ ne dekhā ḳhirad ke kāñdhoñ par
ik junūñ sā savār rahtā hai

lab tabassum meñ ho ga.e mashshāq
dil magar sogvār rahtā hai

ek lamhe bhī soch luuñ un ko
muddatoñ ik ḳhumār rahtā hai

dil rahe be-kalī ke ghere meñ
zehn pe tū savār rahtā hai

tere ḳhvāboñ kī lat lagī jab se
raat kā intizār rahtā hai

sach ke dhāge se jo bane rishta
umr bhar ustuvār rahtā hai

tere dil ne bhī paḌh liyā kalma
jis meñ ye gunahgār rahtā hai

jab se joḌā hai aap se rishta
dāman-e-tār, taar rahtā hai

vo tasavvur meñ ik ghaḌī aa.eñ
der tak dil bahār rahtā hai

chāñd se is liye hai pyaar mujhe
ye bhī yāroñ kā yaar rahtā hai

ghar meñ aate hī mah-jabīñ ne kahā
yaañ to aḳhtar shumār rahtā hai

ab to kar Dāliye vafā us ko
vo jo va.ada udhār rahtā hai

ik taraf gardisheñ zamāne kī
ik taraf terā pyaar rahtā hai

tire dar se juḌā huā muflis
ishq meñ māl-dār rahtā hai

maañ ne de dī duā to hashr talak
us kā bāñdhā hisār rahtā hai

dil meñ sajde kiyā karo 'muftī'
is meñ parvardigār rahtā hai

dil wahi ashk-bar rahta hai
gham se jo ham-kanar rahta hai

main ne dekha KHirad ke kandhon par
ek junun sa sawar rahta hai

lab tabassum mein ho gae mashshaq
dil magar sogwar rahta hai

ek lamhe bhi soch lun un ko
muddaton ek KHumar rahta hai

dil rahe be-kali ke ghere mein
zehn pe tu sawar rahta hai

tere KHwabon ki lat lagi jab se
raat ka intizar rahta hai

sach ke dhage se jo bane rishta
umr bhar ustuwar rahta hai

tere dil ne bhi paDh liya kalma
jis mein ye gunahgar rahta hai

jab se joDa hai aap se rishta
daman-e-tar, tar rahta hai

wo tasawwur mein ek ghaDi aaen
der tak dil bahaar rahta hai

chand se is liye hai pyar mujhe
ye bhi yaron ka yar rahta hai

ghar mein aate hi mah-jabin ne kaha
yan to aKHtar shumar rahta hai

ab to kar Daliye wafa us ko
wo jo wada udhaar rahta hai

ek taraf gardishen zamane ki
ek taraf tera pyar rahta hai

tere dar se juDa hua muflis
ishq mein mal-dar rahta hai

man ne de di dua to hashr talak
us ka bandha hisar rahta hai

dil mein sajde kiya karo 'mufti'
is mein parwardigar rahta hai