ham se milte the sitāre aap ke
phir bhī kho baiThe sahāre aap ke

kaisā jaadū hai samajh aatā nahīñ
niiñd merī ḳhvāb saare aap ke

ham se shāyad mo'tabar Thahrī sabā
jis ne ye gesū sañvāre aap ke

aap kī nazar-e-karam ke muntazir
kab se baiThe haiñ dvāre aap ke

koī us kī aañkh ko bhā.egā kyuuñ
jis ne dekhe hoñ nazāre aap ke

bin tire sāñseñ bhī ab chaltī nahīñ
har ghaḌī chāheñ, ishāre aap ke

muskurā kar dekhiye to ek baar
kahkashāñ, ye chāñd taare aap ke

jhuuT hai 'muftī' bhulā baiThe ho sab
kyuuñ the palkoñ par sitāre aap ke

hum se milte the sitare aap ke
phir bhi kho baiThe sahaare aap ke

kaisa jadu hai samajh aata nahin
nind meri KHwab sare aap ke

hum se shayad mo'tabar Thahri saba
jis ne ye gesu sanware aap ke

aap ki nazar-e-karam ke muntazir
kab se baiThe hain dware aap ke

koi us ki aankh ko bhaega kyun
jis ne dekhe hon nazare aap ke

bin tere sansen bhi ab chalti nahin
har ghaDi chahen, ishaare aap ke

muskura kar dekhiye to ek bar
kahkashan, ye chand tare aap ke

jhuT hai 'mufti' bhula baiThe ho sab
kyun the palkon par sitare aap ke