log hilāl-e-shām se baḌh kar pal meñ māh-e-tamām hue
ham har burj meñ ghaTte ghaTte sub.h talak gumnām hue

un logoñ kī baat karo jo ishq meñ ḳhush-anjām hue
najd meñ qais yahāñ par 'inshā' ḳhaar hue nākām hue

kis kā chamaktā chehrā laa.eñ kis sūraj se māñgeñ dhuup
ghuur añdherā chhā jaatā hai ḳhalvat-e-dil meñ shaam hue

ek se ek junūñ kā maarā is bastī meñ rahtā hai
ek hamīñ hushiyār the yaaro ek hamīñ bad-nām hue

shauq kī aag nafas kī garmī ghaTte ghaTte sard na ho
chaah kī raah dikhā kar tum to vaqf-e-darīcha-o-bām hue

un se bahār o baaġh kī bāteñ kar ke jī ko dukhānā kyā
jin ko ek zamāna guzrā kunj-e-qafas meñ raam hue

'inshā'-sāhib pau phaTtī hai taare Duube sub.h huī
baat tumhārī maan ke ham to shab bhar be-ārām hue

log hilal-e-sham se baDh kar pal mein mah-e-tamam hue
hum har burj mein ghaTte ghaTte subh talak gumnam hue

un logon ki baat karo jo ishq mein KHush-anjam hue
najd mein qais yahan par 'insha' KHar hue nakaam hue

kis ka chamakta chehra laen kis suraj se mangen dhup
ghur andhera chha jata hai KHalwat-e-dil mein sham hue

ek se ek junun ka mara is basti mein rahta hai
ek hamin hushiyar the yaro ek hamin bad-nam hue

shauq ki aag nafas ki garmi ghaTte ghaTte sard na ho
chah ki rah dikha kar tum to waqf-e-daricha-o-baam hue

un se bahaar o bagh ki baaten kar ke ji ko dukhana kya
jin ko ek zamana guzra kunj-e-qafas mein ram hue

'insha'-sahib pau phaTti hai tare Dube subh hui
baat tumhaari man ke hum to shab bhar be-aram hue

Source: Book : Chand Nagar (Pg. 87) Author : Ibn Insha