ham yahāñ rahte haiñ apnī hī nigahbānī meñ
jab se mushkil nazar aane lagī āsānī meñ

mere hāthoñ meñ ye kashkol thamāyā kis ne
kaisā sāmān milā be-sar-o-sāmānī meñ

haa.e kyā log the jo josh-o-junūñ rakhte the
ab koī lutf nahīñ chāk-garebānī meñ

kabhī is shahr meñ kuchh der Thahar kar dekho
zindagānī ko ravāñ maut kī tābānī meñ

ham ne ik umr basar kī hai yahāñ bhī lekin
kuchh izāfa na huā dasht kī vīrānī meñ

aks merā mujhe lagtā hai jahāñ-tāb huā
sar-e-kohsār dikhā.ī jo diyā paanī meñ

mere atrāf haiñ kitne hī parinde ḳhāmosh
hai koī kāmil-e-fan kār-e-sulaimānī meñ

hum yahan rahte hain apni hi nigahbani mein
jab se mushkil nazar aane lagi aasani mein

mere hathon mein ye kashkol thamaya kis ne
kaisa saman mila be-sar-o-samani mein

hae kya log the jo josh-o-junun rakhte the
ab koi lutf nahin chaak-garebani mein

kabhi is shahr mein kuchh der Thahar kar dekho
zindagani ko rawan maut ki tabani mein

hum ne ek umr basar ki hai yahan bhi lekin
kuchh izafa na hua dasht ki virani mein

aks mera mujhe lagta hai jahan-tab hua
sar-e-kohsar dikhai jo diya pani mein

mere atraf hain kitne hi parinde KHamosh
hai koi kaamil-e-fan kar-e-sulaimani mein

Source: Book : Waraq-e-Saadah (Ghazals) (Pg. 23) Author : Hamdam Kashmiri Publication : Sayed Ameen Ashraf (2012) Edition : 2012