vahm koī gumāñ meñ thā hī nahīñ
naqsh apnā nishāñ meñ thā hī nahīñ

mujh se mansūb ho gayā kyuuñ kar
vo jo mere bayāñ meñ thā hī nahīñ

log kaise mirā yaqīñ karte
jhuuT mere bayāñ meñ thā hī nahīñ

chor aayā gayā bhī ḳhālī haath
maiñ to apne makāñ meñ thā hī nahīñ

bas purānī ghisī-piTī bāteñ
rañg taaza bayāñ meñ thā hī nahīñ

phīkī phīkī bahār guzrī hai
rañg apnā ḳhizāñ meñ thā hī nahīñ

ham ne sun kar bhī an-sunī kar dī
kuchh ta.assur azaañ meñ thā hī nahīñ

mere sar ke liye jo ho mauzūñ
sañg vo āstāñ meñ thā hī nahīñ

der se ḳhāmushī hai ḳhema-zan
shor kyā kārvāñ meñ thā hī nahīñ

aa rahā thā zamīn kī jānib
vasvasa āsmāñ meñ thā hī nahīñ

wahm koi guman mein tha hi nahin
naqsh apna nishan mein tha hi nahin

mujh se mansub ho gaya kyun kar
wo jo mere bayan mein tha hi nahin

log kaise mera yaqin karte
jhuT mere bayan mein tha hi nahin

chor aaya gaya bhi KHali hath
main to apne makan mein tha hi nahin

bas purani ghisi-piTi baaten
rang taza bayan mein tha hi nahin

phiki phiki bahaar guzri hai
rang apna KHizan mein tha hi nahin

hum ne sun kar bhi an-suni kar di
kuchh tassur azan mein tha hi nahin

mere sar ke liye jo ho mauzun
sang wo aastan mein tha hi nahin

der se KHamushi hai KHema-zan
shor kya karwan mein tha hi nahin

aa raha tha zamin ki jaanib
waswasa aasman mein tha hi nahin

Source: Book : Waraq-e-saadah (Gazals) (Pg. 25) Author : Hamdam Kashmiri Publication : Hamdam Kashmiri, Khan Mahel, Shrinagar (2012) Edition : 2012