mausam-e-hijr ke aane ke shikāyat nahīñ kī
ai mire dil tujhe kyā ho gayā vahshat nahīñ kī

koī ilzām koī tanz koī rusvā.ī
din bahut ho ga.e yāroñ ne ināyat nahīñ kī

lafz ke shauq meñ aisā bhī maqām aayā hai
juz kisī sher kī aamad koī hasrat nahīñ kī

jis ke nashshe meñ koī hijr guzār aa.e haiñ
vo ghaḌī vasl kī ham ne kabhī ruḳhsat nahīñ kī

ab tujhe kaise batā.eñ ki tirī yādoñ meñ
kuchh izāfa hī kiyā ham ne ḳhayānat nahīñ kī

saare me.aar vafāoñ ke nibhā.e ham ne
us ko chhoḌā to bahut soch ke, ujlat nahīñ kī

ishq dariyā bhī samundar bhī kināra bhī halīm
Dūbne vaale ko dekhā hai to hairat nahīñ kī

mausam-e-hijr ke aane ke shikayat nahin ki
ai mere dil tujhe kya ho gaya wahshat nahin ki

koi ilzam koi tanz koi ruswai
din bahut ho gae yaron ne inayat nahin ki

lafz ke shauq mein aisa bhi maqam aaya hai
juz kisi sher ki aamad koi hasrat nahin ki

jis ke nashshe mein koi hijr guzar aae hain
wo ghaDi wasl ki hum ne kabhi ruKHsat nahin ki

ab tujhe kaise bataen ki teri yaadon mein
kuchh izafa hi kiya hum ne KHayanat nahin ki

sare mear wafaon ke nibhae hum ne
us ko chhoDa to bahut soch ke, ujlat nahin ki

ishq dariya bhi samundar bhi kinara bhi halim
Dubne wale ko dekha hai to hairat nahin ki

Source: Book : Ghazal Calendar-2015 (Pg. 30.04.2015)