martā bhalā hai zabt kī tāqat agar na ho
kitnā hī dard-e-dil ho magar chashm-e-tar na ho

vo sar hī kyā ki jis meñ tumhārā na ho ḳhayāl
vo dil hī kyā ki jis meñ tumhārā guzar na ho

aisī to be-asar nahīñ betābi-e-firāq
naale karūñ maiñ aur kisī ko ḳhabar na ho

mil jaao tum to shab ko baḌhā leñge tā-abad
māñgeñge ye duā ki ilāhī sahar na ho

zulf un kī apne ruḳh pe pareshāñ kareñge ham
Dar hai shab-e-visāl kahīñ muḳhtasar na ho

maiñ huuñ vo tufta-dil kī huā āftāb par
merā gumāñ ki aah kā merī sharar na ho

'shaidā' ko tere ḳhauf kisī kā nahīñ yahāñ
saarā jahāñ ho us kā adū to magar na ho

marta bhala hai zabt ki taqat agar na ho
kitna hi dard-e-dil ho magar chashm-e-tar na ho

wo sar hi kya ki jis mein tumhaara na ho KHayal
wo dil hi kya ki jis mein tumhaara guzar na ho

aisi to be-asar nahin betabi-e-firaq
nale karun main aur kisi ko KHabar na ho

mil jao tum to shab ko baDha lenge ta-abad
mangenge ye dua ki ilahi sahar na ho

zulf un ki apne ruKH pe pareshan karenge hum
Dar hai shab-e-visal kahin muKHtasar na ho

main hun wo tufta-dil ki hua aaftab par
mera guman ki aah ka meri sharar na ho

'shaida' ko tere KHauf kisi ka nahin yahan
sara jahan ho us ka adu to magar na ho