Subscribe to our newsletter and get our newest updates

Hakeem Manzoor

  • Ghazal


bhejta hun har roz main jis ko KHwab koi an-dekha sa


bhejtā huuñ har roz maiñ jis ko ḳhvāb koī an-dekhā sā
us kī āñkheñ saarī ḳhushbū us kā badan ā.īnā sā

us ne bas itnā hī pūchā sabz chīnār ab kitne haiñ
sar se pā tak laraz uThā maiñ dil pe girā ik sho.ala sā

chaTTānoñ ke siine par bhī khul kar jo muskātā hai
sar-mastī kā sar-chashma hai vo ik paudā nanhā sā

logo lab kholo kuchh bolo jhelum hai maTiyālā kyuuñ
maiñ ne jab is ko dekhā thā ye thā ik ā.īnā sā

barf shagūfoñ ke mausam meñ kaash ik baar aa jaate tum
mere ḳhatoñ kī ḳhushbuoñ kā hotā kuchh andāzā sā

phir bhī ai 'manzūr' kisī par haath na ab tak uTThā merā
laḌne kā fan siikh liyā hai go maiñ ne bhī thoḌā sā

bhejta hun har roz main jis ko KHwab koi an-dekha sa
us ki aankhen sari KHushbu us ka badan aaina sa

us ne bas itna hi pucha sabz chinar ab kitne hain
sar se pa tak laraz uTha main dil pe gira ek shoala sa

chaTTanon ke sine par bhi khul kar jo muskata hai
sar-masti ka sar-chashma hai wo ek pauda nanha sa

logo lab kholo kuchh bolo jhelum hai maTiyala kyun
main ne jab is ko dekha tha ye tha ek aaina sa

barf shagufon ke mausam mein kash ek bar aa jate tum
mere KHaton ki KHushbuon ka hota kuchh andaza sa

phir bhi ai 'manzur' kisi par hath na ab tak uTTha mera
laDne ka fan sikh liya hai go main ne bhi thoDa sa


Source: Book : Karwaan-e-Ghazal (Pg. 397) Author : Farooq Argali Publication : Farid Book Depot (Pvt.) Ltd (2004) Edition : 2004

Leave a comment

+