Subscribe to our newsletter and get our newest updates

Hakeem Manzoor

  • Ghazal


safar hi koi rahega na fasla koi


safar hī koī rahegā na fāsla koī
ye ik ḳhayāl hai is par bhī tabsira koī

raqam huā huuñ yaqīn o qayās donoñ meñ
kare to kaise kare merā tajziya koī

vo dast-e-sañg hai maiñ ā.īna-girafta huuñ
na ho sakegā kabhī ham meñ tasfiya koī

zamīñ pe aa.e na aa.e ye vahm hai sab ko
ḳhalā kī god meñ paltā hai hādsa koī

maiñ ik lakīr kā qaidī huuñ bāvajūd is ke
har ik lakīr se miltā hai silsila koī

na jaane kis liye rotā huuñ hañste hañste maiñ
basā huā hai nigāhoñ meñ ā.īna koī

havā sulātī hai dāman meñ zard pattoñ ko
use bhī chāhiye jiine kā mashġhala koī

bhalā hai duur rahe ik harīf kī mānind
hai phir bhī saa.e kā mujh se muāmla koī

likhā gayā nahīñ 'manzūr' aaj tak shāyad
shafaq ke baab meñ sub.hoñ kā tazkira koī

safar hi koi rahega na fasla koi
ye ek KHayal hai is par bhi tabsira koi

raqam hua hun yaqin o qayas donon mein
kare to kaise kare mera tajziya koi

wo dast-e-sang hai main aaina-girafta hun
na ho sakega kabhi hum mein tasfiya koi

zamin pe aae na aae ye wahm hai sab ko
KHala ki god mein palta hai hadsa koi

main ek lakir ka qaidi hun bawajud is ke
har ek lakir se milta hai silsila koi

na jaane kis liye rota hun hanste hanste main
basa hua hai nigahon mein aaina koi

hawa sulati hai daman mein zard patton ko
use bhi chahiye jine ka mashghala koi

bhala hai dur rahe ek harif ki manind
hai phir bhi sae ka mujh se muamla koi

likha gaya nahin 'manzur' aaj tak shayad
shafaq ke bab mein subhon ka tazkira koi


Source: Book : Natamam (Pg. 31) Author : Hakeem Manzoor Publication : Samt Publication 2/48 Rajendar Nagar New Delhi-110060 (1977) Edition : 1977

Leave a comment

+