ajab sahrā badan par aab kā ib.hām rakkhā hai
ye kis ne is samundar kā samundar naam rakkhā hai

vahī ik din shahādat degā merī be-gunāhī kī
vo jis ne qatl-e-gul kā mere sar ilzām rakkhā hai

maiñ tum se pūchhtā huuñ jhīl-dal kī be-zabāñ maujo
tah-e-dāman chhupā kar tum ne kyā paiġhām rakkhā hai

kabhī bādal mere āñgan utartā pūchhtā maiñ bhī
kuhistāñ par barasnā kis ne terā kaam rakkhā hai

rahā hogā vo kitnā dil ġhanī dast-e-saḳhī jis ne
junūñ kī mumlikat kā ek patthar daam rakkhā hai

yahī nā phuul se bichhḌe to āvāra hoñ sahrā meñ
kahūñ kyā kis ne ḳhushbūoñ kā ye anjām rakhā hai

mujhe manzūr vo aqdār bhī radd sab kareñ jin ko
kisī ne soch kar 'manzūr' merā naam rakhā hai

ajab sahra badan par aab ka ibham rakkha hai
ye kis ne is samundar ka samundar nam rakkha hai

wahi ek din shahadat dega meri be-gunahi ki
wo jis ne qatl-e-gul ka mere sar ilzam rakkha hai

main tum se puchhta hun jhil-dal ki be-zaban maujo
tah-e-daman chhupa kar tum ne kya paigham rakkha hai

kabhi baadal mere aangan utarta puchhta main bhi
kuhistan par barasna kis ne tera kaam rakkha hai

raha hoga wo kitna dil ghani dast-e-saKHi jis ne
junun ki mumlikat ka ek patthar dam rakkha hai

yahi na phul se bichhDe to aawara hon sahra mein
kahun kya kis ne KHushbuon ka ye anjam rakha hai

mujhe manzur wo aqdar bhi radd sab karen jin ko
kisi ne soch kar 'manzur' mera nam rakha hai

Source: Book : Sher-e-Aasman (Pg. 67) Author : Maktaba aariz Publication : Maktaba aariz