tumhārī justujū kī hai vahāñ tak
nahīñ pahuñche jahāñ vahm-o-gumāñ tak

jo rishte the hamāre darmiyāñ tak
vo le aa.e hameñ ab imtihāñ tak

mohabbat meñ maqām aayā hai kaisā
ayaañ hone ko hai rāz-e-nihāñ tak

nahīñ miltā tirā saanī kahīñ bhī
nazar pahuñchī hai apnī kahkashāñ tak

palaT kar jab kabhī dekhā to samjhā
kahāñ se aa ga.e haiñ ham kahāñ tak

sambhal kar baat kiije shaiḳh-jī se
rasā.ī un kī hai pīr-e-muġhāñ tak

TaTolā hai unhoñ ne dil ko aksar
magar pahuñche nahīñ dard-e-nihāñ tak

nazar aatā hai bas jalva usī kā
pahuñchtī hai nazar apnī jahāñ tak

ye fasl-e-gul ye bulbul kī asīrī
haiñ fariyādī qafas kī titliyāñ tak

yaqīnan qābil-e-azmat hai 'ġhāzī'
na uf kī sun ke us ne gāliyāñ tak

tumhaari justuju ki hai wahan tak
nahin pahunche jahan wahm-o-guman tak

jo rishte the hamare darmiyan tak
wo le aae hamein ab imtihan tak

mohabbat mein maqam aaya hai kaisa
ayan hone ko hai raaz-e-nihan tak

nahin milta tera sani kahin bhi
nazar pahunchi hai apni kahkashan tak

palaT kar jab kabhi dekha to samjha
kahan se aa gae hain hum kahan tak

sambhal kar baat kije shaiKH-ji se
rasai un ki hai pir-e-mughan tak

TaTola hai unhon ne dil ko aksar
magar pahunche nahin dard-e-nihan tak

nazar aata hai bas jalwa usi ka
pahunchti hai nazar apni jahan tak

ye fasl-e-gul ye bulbul ki asiri
hain fariyaadi qafas ki titliyan tak

yaqinan qabil-e-azmat hai 'ghazi'
na uf ki sun ke us ne galiyan tak

Source: Lamhaat