ġhairat-e-mahr rashk-e-māh ho tum
ḳhūbsūrat ho bādshāh ho tum

jis ne dekhā tumheñ vo mar hī gayā
husn se teġh-e-be-panāh ho tum

kyūñ-kar āñkheñ na ham ko dikhlāo
kaise ḳhush-chashm ḳhush-nigāh ho tum

husn meñ aap ke hai shān-e-ḳhudā
ishq-bāzoñ ke sajda-gāh ho tum

har libās aap ko hai zebinda
jāma-zeboñ ke bādshāh ho tum

fauq hai saare ḳhush-jamāloñ par
vo sitāre jo haiñ to maah ho tum

ham se parda vahī hijāb kā hai
kūcha-gardoñ se rū-barāh ho tum

kyuuñ mohabbat baḌhā.ī thī tum se
ham gunāhgār be-gunāh ho tum

jo ki haqq-e-vafā bajā laa.e
shāhid allāh hai gavāh ho tum

hai tumhārā ḳhayāl pesh-e-nazar
jis taraf jaa.eñ sadd-e-rāh ho tum

donoñ bande usī ke haiñ 'ātish'
ḳhvāh ham us meñ hoveñ ḳhvāh ho tum

ghairat-e-mahr rashk-e-mah ho tum
KHubsurat ho baadshah ho tum

jis ne dekha tumhein wo mar hi gaya
husn se tegh-e-be-panah ho tum

kyun-kar aankhen na hum ko dikhlao
kaise KHush-chashm KHush-nigah ho tum

husn mein aap ke hai shan-e-KHuda
ishq-bazon ke sajda-gah ho tum

har libas aap ko hai zebinda
jama-zebon ke baadshah ho tum

fauq hai sare KHush-jamalon par
wo sitare jo hain to mah ho tum

hum se parda wahi hijab ka hai
kucha-gardon se ru-barah ho tum

kyun mohabbat baDhai thi tum se
hum gunahgar be-gunah ho tum

jo ki haqq-e-wafa baja lae
shahid allah hai gawah ho tum

hai tumhaara KHayal pesh-e-nazar
jis taraf jaen sadd-e-rah ho tum

donon bande usi ke hain 'atish'
KHwah hum us mein howen KHwah ho tum

Source: Kulliyat-e-Khwaja Haidar Ali Aatish