Subscribe to our newsletter and get our newest updates

Haidar Ali Aatish

  • Ghazal


bala-e-jaan mujhe har ek KHush-jamal hua


balā-e-jāñ mujhe har ek ḳhush-jamāl huā
chhurī jo tez huī pahle maiñ halāl huā

girau huā to use chhūTnā muhāl huā
dil-e-ġharīb mirā muflisoñ kā maal huā

kamī nahīñ tirī dargāh meñ kisī shai kī
vahī milā hai jo muhtāj kā savāl huā

dikhā ke chehra-e-raushan vo kahte haiñ sar-e-shām
vo āftāb nahīñ hai jise zavāl huā

dukhā na dil ko sanam ittihād rakhtā huuñ
mujhe malāl huā to tujhe malāl huā

bujhāyā āñkhoñ ne vo ruḳh talāsh-e-mazmūñ meñ
ḳhayāl-e-yār mirā sher kā ḳhayāl huā

tire shahīd ke jeb-e-kafan meñ ai qātil
gulāl se bhī hai rañg-e-abīr laal huā

buland ḳhāk-nashīnī ne qadr kī merī
uruuj mujh ko huā jab ki pā.emāl huā

ġhazab meñ yaar ke shān-e-karam nazar aa.ī
banāyā sarv-e-charāġhāñ jise nihāl huā

yaqīñ hai dekhte suufī to dam nikal jaatā
hamāre vajd ke aalam meñ hai jo haal huā

vo nā-tavāñ thā irāda kiyā jo khāne kā
ġham-e-firāq ke dāñtoñ meñ maiñ ḳhilāl huā

kiyā hai zaar ye terī kamar ke saude ne
paḌā jo aks mirā ā.īne meñ baal huā

dikhānī thī na tumheñ chashm-e-surmagīñ apnī
nigāh-e-nāz se vahshat-zada ġhazāl huā

dahān-e-yār ke bose kī dil ne raġhbat kī
ḳhayāl-e-ḳhām kiyā tālib-e-muhāl huā

rahā bahār-o-ḳhizāñ meñ ye haal saude kā
baḌhā to zulf huā ghaT gayā to ḳhaal huā

junūñ meñ ālam-e-tiflī kī bādshāhat kī
khilaunā āñkhoñ meñ apnī har ik ġhazāl huā

sunā jamīl bhī terā jo naam ai mahbūb
hazār jaan se dil banda-e-jamāl huā

likhā hai āshiqoñ meñ apne tū ne jis kā naam
phir us kā chehra nahīñ umr bhar bahāl huā

gunah kisī ne kiyā thartharāyā dil apnā
araq araq hue ham jis ko infi.āl huā

tire dahān o kamar kā jo zikr aayā yaar
gumān-o-vahm ko kyā kyā na ehtimāl huā

kamāl kaun sā hai vo jise zavāl nahīñ
hazār shukr ki mujh ko na kuchh kamāl huā

tumhārī abrū-e-kaj kā thā duuj kā dhokā
siyāh hotā agar iid kā hilāl huā

diyā jo rañj tire ishq ne to rāhat thī
firāq-e-talḳh to shīrīñ mujhe visāl huā

vahī hai lauh-e-shikast-e-tilism-e-jism 'ātish'
jab e'tidā-e-anāsir meñ iḳhtilāl huā

bala-e-jaan mujhe har ek KHush-jamal hua
chhuri jo tez hui pahle main halal hua

girau hua to use chhuTna muhaal hua
dil-e-gharib mera muflison ka mal hua

kami nahin teri dargah mein kisi shai ki
wahi mila hai jo muhtaj ka sawal hua

dikha ke chehra-e-raushan wo kahte hain sar-e-sham
wo aaftab nahin hai jise zawal hua

dukha na dil ko sanam ittihad rakhta hun
mujhe malal hua to tujhe malal hua

bujhaya aankhon ne wo ruKH talash-e-mazmun mein
KHayal-e-yar mera sher ka KHayal hua

tere shahid ke jeb-e-kafan mein ai qatil
gulal se bhi hai rang-e-abir lal hua

buland KHak-nashini ne qadr ki meri
uruj mujh ko hua jab ki paemal hua

ghazab mein yar ke shan-e-karam nazar aai
banaya sarw-e-charaghan jise nihaal hua

yaqin hai dekhte sufi to dam nikal jata
hamare wajd ke aalam mein hai jo haal hua

wo na-tawan tha irada kiya jo khane ka
gham-e-firaq ke danton mein main KHilal hua

kiya hai zar ye teri kamar ke saude ne
paDa jo aks mera aaine mein baal hua

dikhani thi na tumhein chashm-e-surmagin apni
nigah-e-naz se wahshat-zada ghazal hua

dahan-e-yar ke bose ki dil ne raghbat ki
KHayal-e-KHam kiya talib-e-muhaal hua

raha bahaar-o-KHizan mein ye haal saude ka
baDha to zulf hua ghaT gaya to KHal hua

junun mein aalam-e-tifli ki baadshahat ki
khilauna aankhon mein apni har ek ghazal hua

suna jamil bhi tera jo nam ai mahbub
hazar jaan se dil banda-e-jamal hua

likha hai aashiqon mein apne tu ne jis ka nam
phir us ka chehra nahin umr bhar bahaal hua

gunah kisi ne kiya thartharaya dil apna
araq araq hue hum jis ko infial hua

tere dahan o kamar ka jo zikr aaya yar
guman-o-wahm ko kya kya na ehtimal hua

kamal kaun sa hai wo jise zawal nahin
hazar shukr ki mujh ko na kuchh kamal hua

tumhaari abru-e-kaj ka tha duj ka dhoka
siyah hota agar id ka hilal hua

diya jo ranj tere ishq ne to rahat thi
firaq-e-talKH to shirin mujhe visal hua

wahi hai lauh-e-shikast-e-tilism-e-jism 'atish'
jab e'tida-e-anasir mein iKHtilal hua


Source: Kulliyat-e-Khwaja Haidar Ali Aatish

Leave a comment

+