aable paaoñ ke kyā tū ne hamāre toḌe
ḳhār-e-sahrā-e-junūñ arsh ke taare toḌe

zaqan o ruḳh meñ na jāsūsoñ se baaqī rakkhī
samar-e-gul chaman-e-husn ke saare toḌe

silsila apnī giraftārī kā kab qat.a huā
pahnī pāzeb unhoñ ne jo utāre toḌe

mast mujh sā bhī koī nashsha kā hogā na harīs
pī ke mai jaam ke dāñtoñ se kināre toḌe

sharbat-e-vasl hai tanqīd kī ḳhātir maujūd
tap-e-hijr aa ke badan ko na hamāre toḌe

ḳhatm duzdīda nigah par hai tirī tarrārī
dil nahīñ toḌe ahibbā ke piTāre toḌe

aa gayā vo shajar-e-husn nazar jab ham ko
bosa le kar lab-e-shīrīñ ke chuvāre toḌe

ishq be-dard se karne ko kahā thā kis ne
sar ko Takrā ke na dil dard ke maare toḌe

kunj-e-uzlat meñ biThāyā hai ḳhudā ne 'ātish'
ab jo tum yaañ se hile paaoñ tumhāre toḌe

aable paon ke kya tu ne hamare toDe
KHar-e-sahra-e-junun arsh ke tare toDe

zaqan o ruKH mein na jasuson se baqi rakkhi
samar-e-gul chaman-e-husn ke sare toDe

silsila apni giraftari ka kab qata hua
pahni pazeb unhon ne jo utare toDe

mast mujh sa bhi koi nashsha ka hoga na haris
pi ke mai jam ke danton se kinare toDe

sharbat-e-wasl hai tanqid ki KHatir maujud
tap-e-hijr aa ke badan ko na hamare toDe

KHatm duzdida nigah par hai teri tarrari
dil nahin toDe ahibba ke piTare toDe

aa gaya wo shajar-e-husn nazar jab hum ko
bosa le kar lab-e-shirin ke chuware toDe

ishq be-dard se karne ko kaha tha kis ne
sar ko Takra ke na dil dard ke mare toDe

kunj-e-uzlat mein biThaya hai KHuda ne 'atish'
ab jo tum yan se hile paon tumhaare toDe

Source: Kulliyat-e-Khwaja Haidar Ali Aatish