vahī chitvan kī ḳhūñ-ḳhvārī jo aage thī so ab bhī hai
tirī āñkhoñ kī bīmārī jo aage thī so ab bhī hai

vahī nashv-o-numā-e-sabza hai gor-e-ġharībāñ par
havā-e-charḳh-e-zañgārī jo aage thī so ab bhī hai

ta.alluq hai vahī tā-hāl un zulfoñ ke saude se
salāsil kī giraftārī jo aage thī so ab bhī hai

vahī sar kā paTaknā hai vahī ronā hai din bhar kā
vahī rātoñ kī bedārī jo aage thī so ab bhī hai

rivāj-e-ishq ke aa.iiñ vahī haiñ kishvar-e-dil meñ
rah-o-rasm-e-vafā jaarī jo aage thī so ab bhī hai

vahī jī kā jalānā hai pakānā hai vahī dil kā
vo us kī garm-bāzārī jo aage thī so ab bhī hai

niyāz-e-ḳhādimāna hai vahī fazl-e-ilāhī se
butoñ kī nāz-bardārī jo aage thī so ab bhī hai

firāq-e-yār meñ jis tarah se martā thā martā huuñ
vo ruuh o tan kī be-zārī jo aage thī so ab bhī hai

vahī saudā-e-kākul kā hai aalam jo ki sābiq thā
ye shab bīmār par bhārī jo aage thī so ab bhī hai

junūñ kī garm-joshī hai vahī dīvānoñ se apnī
vahī dāġhoñ kī gul-kārī jo aage thī so ab bhī hai

vahī bāzār-e-garmī hai mohabbat kī hanūz 'ātish'
vo yūsuf kī ḳharīdārī jo aage thī so ab bhī hai

wahi chitwan ki KHun-KHwari jo aage thi so ab bhi hai
teri aankhon ki bimari jo aage thi so ab bhi hai

wahi nashw-o-numa-e-sabza hai gor-e-ghariban par
hawa-e-charKH-e-zangari jo aage thi so ab bhi hai

talluq hai wahi ta-haal un zulfon ke saude se
salasil ki giraftari jo aage thi so ab bhi hai

wahi sar ka paTakna hai wahi rona hai din bhar ka
wahi raaton ki bedari jo aage thi so ab bhi hai

riwaj-e-ishq ke aain wahi hain kishwar-e-dil mein
rah-o-rasm-e-wafa jari jo aage thi so ab bhi hai

wahi ji ka jalana hai pakana hai wahi dil ka
wo us ki garm-bazari jo aage thi so ab bhi hai

niyaz-e-KHadimana hai wahi fazl-e-ilahi se
buton ki naz-bardari jo aage thi so ab bhi hai

firaq-e-yar mein jis tarah se marta tha marta hun
wo ruh o tan ki be-zari jo aage thi so ab bhi hai

wahi sauda-e-kakul ka hai aalam jo ki sabiq tha
ye shab bimar par bhaari jo aage thi so ab bhi hai

junun ki garm-joshi hai wahi diwanon se apni
wahi daghon ki gul-kari jo aage thi so ab bhi hai

wahi bazar-e-garmi hai mohabbat ki hanuz 'atish'
wo yusuf ki KHaridari jo aage thi so ab bhi hai

RECITATIONS Fasih Akmal



00:00/00:00 wahi chitwan ki KHun-KHwari jo aage thi so ab bhi hai Fasih Akmal

Source: Kulliyat-e-Khwaja Haidar Ali Aatish