Subscribe to our newsletter and get our newest updates

Haidar Ali Aatish

  • Ghazal


chaman mein shab ko jo wo shoKH be-naqab aaya


chaman meñ shab ko jo vo shoḳh be-naqāb aayā
yaqīn ho gayā shabnam ko āftāb aayā

un añkhḌiyoñ meñ agar nashsha-e-sharāb aayā
salām jhuk ke karūñgā jo phir hijāb aayā

kisī ke mahram-e-āb-e-ravāñ kī yaad aa.ī
habāb ke jo barābar kabhī habāb aayā

shab-e-firāq meñ mujh ko sulāne aayā thā
jagāyā maiñ ne jo afsāna-go ko ḳhvāb aayā

adam meñ hastī se jā kar yahī kahūñgā maiñ
hazār hasrat-e-zinda ko gaaḌ daab aayā

chakor husn-e-mah-e-chār-dah ko bhuul gayā
murād par jo tirā ālam-e-shabāb aayā

mohabbat-e-mai-o-māshūq tark kar 'ātish'
safed baal hue mausam-e-ḳhizāb aayā

chaman mein shab ko jo wo shoKH be-naqab aaya
yaqin ho gaya shabnam ko aaftab aaya

un ankhDiyon mein agar nashsha-e-sharab aaya
salam jhuk ke karunga jo phir hijab aaya

kisi ke mahram-e-ab-e-rawan ki yaad aai
habab ke jo barabar kabhi habab aaya

shab-e-firaq mein mujh ko sulane aaya tha
jagaya main ne jo afsana-go ko KHwab aaya

adam mein hasti se ja kar yahi kahunga main
hazar hasrat-e-zinda ko gaD dab aaya

chakor husn-e-mah-e-chaar-dah ko bhul gaya
murad par jo tera aalam-e-shabab aaya

mohabbat-e-mai-o-mashuq tark kar 'atish'
safed baal hue mausam-e-KHizab aaya


Leave a comment

+