ik dard sā pahlū meñ machaltā hai sar-e-shām
jab chāñd jharoke meñ nikaltā hai sar-e-shām

be-nām sī ik aag dahak uThtī hai dil meñ
mahtāb jo ThanDak sī ugaltā hai sar-e-shām

kuchh der shafaq phūltī hai jaise ufuq par
aise hī mirā haal sambhaltā hai sar-e-shām

ye dil hai mirā yā kisī kuTiyā kā diyā hai
bujhtā hai dam-e-sub.h to jaltā hai sar-e-shām

bantā hai vo ik chehra kabhī gul kabhī sho.ala
sāñche meñ ḳhayāloñ ke jo Dhaltā hai sar-e-shām

chhaT jaatī hai ālām-e-zamāna kī siyāhī
jab daur tirī yaad kā chaltā hai sar-e-shām

maiñ duur bahut duur pahuñch jaatā huuñ 'tā.ib'
ruḳh soch kā dhārā jo badaltā hai sar-e-shām

ek dard sa pahlu mein machalta hai sar-e-sham
jab chand jharoke mein nikalta hai sar-e-sham

be-nam si ek aag dahak uThti hai dil mein
mahtab jo ThanDak si ugalta hai sar-e-sham

kuchh der shafaq phulti hai jaise ufuq par
aise hi mera haal sambhalta hai sar-e-sham

ye dil hai mera ya kisi kuTiya ka diya hai
bujhta hai dam-e-subh to jalta hai sar-e-sham

banta hai wo ek chehra kabhi gul kabhi shoala
sanche mein KHayalon ke jo Dhalta hai sar-e-sham

chhaT jati hai aalam-e-zamana ki siyahi
jab daur teri yaad ka chalta hai sar-e-sham

main dur bahut dur pahunch jata hun 'taib'
ruKH soch ka dhaara jo badalta hai sar-e-sham

Source: Book : Beesveen Sadi Ki Behtareen Ishqiya Ghazlen (Pg. 83) Book : Beesveen Sadi Ki Behtareen Ishqiya Ghazlen (Pg. 83)