vo hue aise mehrbāñ mujh par
baar hone lagā jahāñ mujh par

kitnī shaffāf zindagānī thī
ab to chhāne lagā dhuāñ mujh par

us ne aa kar na kuchh safā.ī dī
qisse hote rahe bayāñ mujh par

gul ke mānind ye sarāpā thā
jaane kab aa ga.ī ḳhizāñ mujh par

mere dam se chaman meñ rañgat thī
rashk kartī thiiñ titliyāñ mujh par

maiñ jahāñ se chalī bhī jā.ūñ to
kyā karegā koī fuġhāñ mujh par

jab bhī us ne sunī na baat mirī
kitnī bāteñ huiiñ ayaañ mujh par

ab to 'nik.hat' nahīñ hai phūloñ meñ
phir bhī uThtī haiñ uñgliyāñ mujh par

wo hue aise mehrban mujh par
bar hone laga jahan mujh par

kitni shaffaf zindagani thi
ab to chhane laga dhuan mujh par

us ne aa kar na kuchh safai di
qisse hote rahe bayan mujh par

gul ke manind ye sarapa tha
jaane kab aa gai KHizan mujh par

mere dam se chaman mein rangat thi
rashk karti thin titliyan mujh par

main jahan se chali bhi jaun to
kya karega koi fughan mujh par

jab bhi us ne suni na baat meri
kitni baaten huin ayan mujh par

ab to 'nikhat' nahin hai phulon mein
phir bhi uThti hain ungliyan mujh par