vo mujh meñ thā nihāñ maiñ dekhtā kyā
pas-e-dīvār-e-jāñ maiñ dekhtā kyā

kitāb-e-zindagī zer-e-nazar thī
hadīs-e-dil-barāñ maiñ dekhtā kyā

mujhe chalnā thā apne rāste par
niahān-e-raftgāñ maiñ dekhtā kyā

nazar meñ thā vo mahtāb-e-tamannā
jamāl-e-kahkashāñ maiñ dekhtā kyā

fanā kī zad pe thā bāzār-e-duniyā
yahāñ sūd-o-ziyāñ maiñ dekhtā kyā

mirī āñkheñ bharī thiiñ āñsuoñ se
sar-e-shahar-e-fuġhāñ maiñ dekhtā kyā

Thikānā thā mirā dasht-e-junūñ meñ
ḳhirad kī bastiyāñ maiñ dekhtā kyā

mirī majbūriyāñ bhī kam nahīñ thiiñ
tirī majbūriyāñ maiñ dekhtā kyā

use jab imtihāñ lenā nahīñ thā
nisāb-e-imtihāñ maiñ dekhtā kyā

mirī parvāz thī 'shāhid' falak par
zamīñ kī pastiyāñ maiñ dekhtā kyā

wo mujh mein tha nihan main dekhta kya
pas-e-diwar-e-jaan main dekhta kya

kitab-e-zindagi zer-e-nazar thi
hadis-e-dil-baran main dekhta kya

mujhe chalna tha apne raste par
niahan-e-raftgan main dekhta kya

nazar mein tha wo mahtab-e-tamanna
jamal-e-kahkashan main dekhta kya

fana ki zad pe tha bazar-e-duniya
yahan sud-o-ziyan main dekhta kya

meri aankhen bhari thin aansuon se
sar-e-shahar-e-fughan main dekhta kya

Thikana tha mera dasht-e-junun mein
KHirad ki bastiyan main dekhta kya

meri majburiyan bhi kam nahin thin
teri majburiyan main dekhta kya

use jab imtihan lena nahin tha
nisab-e-imtihan main dekhta kya

meri parwaz thi 'shahid' falak par
zamin ki pastiyan main dekhta kya