baḌe adab se ġhurūr-e-sitam-garāñ bolā
jab inqalāb ke lahje meñ be-zabāñ bolā

takoge yūñhī havāoñ kā muñh bhalā kab tak
ye nā-ḳhudāoñ se ik roz bādbāñ bolā

chaman meñ sab kī zabāñ par thī merī mazlūmī
mire ḳhilāf jo bolā to bāġhbāñ bolā

yahī bahut hai ki zinda to ho miyāñ-sāhab
zamāna sun ke mire ġham kī dāstāñ bolā

hisār-e-jabr meñ zinda badan jalā.e ga.e
kisī ne dam nahīñ maarā magar dhuāñ bolā

asar huā to ye taqrīr kā kamāl nahīñ
mirā ḳhulūs muḳhātab thā maiñ kahāñ bolā

kahā na thā ki navāzeñge ham 'hafīz' tujhe
uḌā ke vo mire dāman kī dhajjiyāñ bolā

baDe adab se ghurur-e-sitam-garan bola
jab inqalab ke lahje mein be-zaban bola

takoge yunhi hawaon ka munh bhala kab tak
ye na-KHudaon se ek roz baadban bola

chaman mein sab ki zaban par thi meri mazlumi
mere KHilaf jo bola to baghban bola

yahi bahut hai ki zinda to ho miyan-sahab
zamana sun ke mere gham ki dastan bola

hisar-e-jabr mein zinda badan jalae gae
kisi ne dam nahin mara magar dhuan bola

asar hua to ye taqrir ka kamal nahin
mera KHulus muKHatab tha main kahan bola

kaha na tha ki nawazenge hum 'hafiz' tujhe
uDa ke wo mere daman ki dhajjiyan bola

Source: Rooh-e-Ghazal,Pachas Sala Intekhab