dil par lagā rahī hai vo nīchī nigāh choT
phir choT bhī vo choT jo hai be-panāh choT

phoḌā sar us ke dar se ki barse junūñ meñ sañg
mujh ko dilā rahī hai ajab ishtibāh choT

bijlī kā naam sunte hī āñkheñ jhapak ga.iiñ
rokegī merī aah kī kyā ye nigāh choT

lālach asar kā ho na kahīñ bā.is-e-zarar
Takrā ke sar falak se na khā jaa.e aah choT

muñh har dahān-e-zaḳhm kā siite haiñ is liye
matlab hai hashr meñ bhī na ho dād-ḳhvāh choT

miltī hai chup kī daad ye mash.hūr baat hai
jal jaa.e āsmāñ jo kare zabt aah choT

uThte hī dil meñ Tiis jigar meñ Tapak huī
kartī hai dard-e-hijr se goyā nibāh choT

chaukhaT pe terī shab ko paTaktā hai sar 'hafīz'
bāvar na ho to dekh jabīn hai gavāh choT

dil par laga rahi hai wo nichi nigah choT
phir choT bhi wo choT jo hai be-panah choT

phoDa sar us ke dar se ki barse junun mein sang
mujh ko dila rahi hai ajab ishtibah choT

bijli ka nam sunte hi aankhen jhapak gain
rokegi meri aah ki kya ye nigah choT

lalach asar ka ho na kahin bais-e-zarar
Takra ke sar falak se na kha jae aah choT

munh har dahan-e-zaKHm ka site hain is liye
matlab hai hashr mein bhi na ho dad-KHwah choT

milti hai chup ki dad ye mashhur baat hai
jal jae aasman jo kare zabt aah choT

uThte hi dil mein Tis jigar mein Tapak hui
karti hai dard-e-hijr se goya nibah choT

chaukhaT pe teri shab ko paTakta hai sar 'hafiz'
bawar na ho to dekh jabin hai gawah choT