Subscribe to our newsletter and get our newest updates

Hafeez Jaunpuri

  • Ghazal


likh de aamil koi aisa tawiz


likh de aamil koī aisā ta.avīz
yaar ho jaa.e gale kā ta.avīz

kab musaḳhḳhar ye hasīñ hote haiñ
sab ye be-kār hai ganDā-ta.avīz

na huā yaar kā ġhussa ThanDā
bār-hā dho ke pilāyā ta.avīz

sar se gesū kī balā jaatī hai
laa.e to radd-e-balā kā ta.avīz

mar ke bhī dil kī taḌap itnī hai
shaq huā merī lahad kā ta.avīz

har tarah hotī hai māyūsī jab
log karte haiñ duā yā ta.avīz

aarzū ḳhaak meñ dushman kī mile
is liye dafn kiyā thā ta.avīz

haath se apne jo likkhā us ne
ham ne us ḳhat ko banāyā ta.avīz

jis se aayā huā dil ruk jaa.e
koī aisā bhī hai laTkā ta.avīz

dil pasījā na kisī din un kā
roz likh likh ke jalāyā ta.avīz

kaam lo jazb-e-mohabbat se 'hafīz'
naqsh kyā chiiz hai kaisā ta.avīz

likh de aamil koi aisa tawiz
yar ho jae gale ka tawiz

kab musaKHKHar ye hasin hote hain
sab ye be-kar hai ganDa-tawiz

na hua yar ka ghussa ThanDa
bar-ha dho ke pilaya tawiz

sar se gesu ki bala jati hai
lae to radd-e-bala ka tawiz

mar ke bhi dil ki taDap itni hai
shaq hua meri lahad ka tawiz

har tarah hoti hai mayusi jab
log karte hain dua ya tawiz

aarzu KHak mein dushman ki mile
is liye dafn kiya tha tawiz

hath se apne jo likkha us ne
hum ne us KHat ko banaya tawiz

jis se aaya hua dil ruk jae
koi aisa bhi hai laTka tawiz

dil pasija na kisi din un ka
roz likh likh ke jalaya tawiz

kaam lo jazb-e-mohabbat se 'hafiz'
naqsh kya chiz hai kaisa tawiz


Leave a comment

+