Subscribe to our newsletter and get our newest updates

Hafeez Jalandhari

  • Ghazal


phir lutf-e-KHalish dene lagi yaad kisi ki


phir lutf-e-ḳhalish dene lagī yaad kisī kī
phir bhuul ga.ī yaad ko be-dād kisī kī

phir rañj-o-alam ko hai kisī kā ye ishāra
ujḌī huī bastī karo ābād kisī kī

phir ḳhat kā javāb ek vahī tanz kā misra.a
majbūr hai kyuuñ fitrat-e-āzād kisī kī

phir de ke ḳhushī ham use nāshād kareñ kyuuñ
ġham hī se tabī.at hai agar shaad kisī kī

phir pand-o-nasīhat ke liye aane lage dost
vo dost jo karte nahīñ imdād kisī kī

phir shahr meñ charchā hai na.ī sañg-zanī kā
aḳhbār meñ phir darj hai rūdād kisī kī

phir bāb-e-asar kā koī rasta nahīñ miltā
phir bhaTkī huī phirtī hai fariyād kisī kī

phir ḳhaak uḌāte hue phirte haiñ bagūle
phir dasht meñ miTTī huī barbād kisī kī

phir maiñ bhī karūñ kyuuñ na 'hafīz' is pe tasallut
jāgīr nahīñ tab-e-ḳhudā-dād kisī kī

phir lutf-e-KHalish dene lagi yaad kisi ki
phir bhul gai yaad ko be-dad kisi ki

phir ranj-o-alam ko hai kisi ka ye ishaara
ujDi hui basti karo aabaad kisi ki

phir KHat ka jawab ek wahi tanz ka misra
majbur hai kyun fitrat-e-azad kisi ki

phir de ke KHushi hum use nashad karen kyun
gham hi se tabiat hai agar shad kisi ki

phir pand-o-nasihat ke liye aane lage dost
wo dost jo karte nahin imdad kisi ki

phir shahr mein charcha hai nai sang-zani ka
aKHbar mein phir darj hai rudad kisi ki

phir bab-e-asar ka koi rasta nahin milta
phir bhaTki hui phirti hai fariyaad kisi ki

phir KHak uDate hue phirte hain bagule
phir dasht mein miTTi hui barbaad kisi ki

phir main bhi karun kyun na 'hafiz' is pe tasallut
jagir nahin tab-e-KHuda-dad kisi ki


Source: Book : Kulliyat-e-Hafeez Jalandhari (Pg. 217)

Leave a comment

+