vo sarḳhushī de ki zindagī ko shabāb se bahara-yāb kar de
mire ḳhayāloñ meñ rañg bhar de mire lahū ko sharāb kar de

haqīqateñ āshkār kar de sadāqateñ be-hijāb kar de
har ek zarra ye kah rahā hai ki aa mujhe āftāb kar de

ye ḳhvāb kyā hai ye zisht kyā hai jahāñ kī aslī sirisht kyā hai
baḌā mazā ho tamām chehre agar koī be-naqāb kar de

kaho to rāz-e-hayāt kah duuñ haqīqat-e-kā.enāt kah duuñ
vo baat kah duuñ ki pattharoñ ke jigar ko bhī aab aab kar de

ḳhilāf-e-taqdīr kar rahā huuñ phir ek taqsīr kar rahā huuñ
phir ek tadbīr kar rahā huuñ ḳhudā agar kāmyāb kar de

tire karam ke muāmle ko tire karam hī pe chhoḌtā huuñ
mirī ḳhatā.eñ shumār kar le mirī sazā kā hisāb kar de

'hafīz' sab se baḌī ḳharābī hai ishq meñ lutf-e-kām-yābī
kisī kī duniyā tabāh kar de kisī kī uqbā ḳharāb kar de

wo sarKHushi de ki zindagi ko shabab se bahara-yab kar de
mere KHayalon mein rang bhar de mere lahu ko sharab kar de

haqiqaten aashkar kar de sadaqaten be-hijab kar de
har ek zarra ye kah raha hai ki aa mujhe aaftab kar de

ye KHwab kya hai ye zisht kya hai jahan ki asli sirisht kya hai
baDa maza ho tamam chehre agar koi be-naqab kar de

kaho to raaz-e-hayat kah dun haqiqat-e-kaenat kah dun
wo baat kah dun ki pattharon ke jigar ko bhi aab aab kar de

KHilaf-e-taqdir kar raha hun phir ek taqsir kar raha hun
phir ek tadbir kar raha hun KHuda agar kaamyab kar de

tere karam ke muamle ko tere karam hi pe chhoDta hun
meri KHataen shumar kar le meri saza ka hisab kar de

'hafiz' sab se baDi KHarabi hai ishq mein lutf-e-kaam-yabi
kisi ki duniya tabah kar de kisi ki uqba KHarab kar de