rañg badlā yaar ne vo pyaar kī bāteñ ga.iiñ
vo mulāqāteñ ga.iiñ vo chāñdnī rāteñ ga.iiñ

pī to letā huuñ magar piine kī vo bāteñ ga.iiñ
vo javānī vo siyah-mastī vo barsāteñ ga.iiñ

allāh allāh kah ke bas ik aah karnā rah gayā
vo namāzeñ vo duā.eñ vo munājāteñ ga.iiñ

hazrat-e-dil ab na.ī ulfat samajh kar soch kar
aglī bātoñ par na bhūleñ aap vo bāteñ ga.iiñ

rāh-o-rasm-e-dostī qaa.em to hai lekin 'hafīz'
ibtidā-e-shauq kī lambī mulāqāteñ ga.iiñ

rang badla yar ne wo pyar ki baaten gain
wo mulaqaten gain wo chandni raaten gain

pi to leta hun magar pine ki wo baaten gain
wo jawani wo siyah-masti wo barsaten gain

allah allah kah ke bas ek aah karna rah gaya
wo namazen wo duaen wo munajaten gain

hazrat-e-dil ab nai ulfat samajh kar soch kar
agli baaton par na bhulen aap wo baaten gain

rah-o-rasm-e-dosti qaem to hai lekin 'hafiz'
ibtida-e-shauq ki lambi mulaqaten gain

Source: Book : Kulliyat-e-Hafeez Jalandhari (Pg. 146)