ab to kuchh aur bhī añdherā hai
ye mirī raat kā saverā hai

rahzanoñ se to bhaag niklā thā
ab mujhe rahbaroñ ne gherā hai

aage aage chalo tabar vaalo
abhī jañgal bahut ghanerā hai

qāfila kis kī pairvī meñ chale
kaun sab se baḌā luTerā hai

sar pe raahī ke sarbarāhī ne
kyā safā.ī kā haath pherā hai

surma-ālūd ḳhushk āñsuoñ ne
nūr-e-jāñ ḳhaak par bikherā hai

raakh raakh ustuḳhvāñ safed safed
yahī manzil yahī baserā hai

ai mirī jaan apne jī ke sivā
kaun terā hai kaun merā hai

so raho ab 'hafīz' jī tum bhī
ye na.ī zindagī kā Derā hai

ab to kuchh aur bhi andhera hai
ye meri raat ka sawera hai

rahzanon se to bhag nikla tha
ab mujhe rahbaron ne ghera hai

aage aage chalo tabar walo
abhi jangal bahut ghanera hai

qafila kis ki pairwi mein chale
kaun sab se baDa luTera hai

sar pe rahi ke sarbarahi ne
kya safai ka hath phera hai

surma-alud KHushk aansuon ne
nur-e-jaan KHak par bikhera hai

rakh rakh ustuKHwan safed safed
yahi manzil yahi basera hai

ai meri jaan apne ji ke siwa
kaun tera hai kaun mera hai

so raho ab 'hafiz' ji tum bhi
ye nai zindagi ka Dera hai