mujhe shaad rakhnā ki nāshād rakhnā
mire diida o dil ko ābād rakhnā

bhulā.ī nahīñ jā sakeñgī ye bāteñ
tumheñ yaad ā.eñge ham yaad rakhnā

vo nāshād o barbād rakhte haiñ mujh ko
ilāhī unheñ shaad o ābād rakhnā

tumheñ bhī qasam hai ki jo sar jhukā de
usī ko tah-e-teġh-e-bedād rakhnā

mileñge tumheñ raah meñ but-kade bhī
zarā apne allāh ko yaad rakhnā

jahāñ bhī nashe meñ qadam laḌkhaḌā.eñ
vahīñ ek masjid kī buniyād rakhnā

sitāroñ pe chalte hue ibn-e-ādam
nazar meñ farishtoñ kī uftād rakhnā

'hafīz' apne afkār kī sādgī ko
takalluf kī uljhan se āzād rakhnā

mujhe shad rakhna ki nashad rakhna
mere dida o dil ko aabaad rakhna

bhulai nahin ja sakengi ye baaten
tumhein yaad aaenge hum yaad rakhna

wo nashad o barbaad rakhte hain mujh ko
ilahi unhen shad o aabaad rakhna

tumhein bhi qasam hai ki jo sar jhuka de
usi ko tah-e-tegh-e-bedad rakhna

milenge tumhein rah mein but-kade bhi
zara apne allah ko yaad rakhna

jahan bhi nashe mein qadam laDkhaDaen
wahin ek masjid ki buniyaad rakhna

sitaron pe chalte hue ibn-e-adam
nazar mein farishton ki uftad rakhna

'hafiz' apne afkar ki sadgi ko
takalluf ki uljhan se aazad rakhna

Source: Book : Kulliyat-e-Hafeez Jalandhari (Pg. 446)