Subscribe to our newsletter and get our newest updates

Hafeez Banarasi

  • Ghazal


gumrah kah ke pahle jo mujhse KHafa hue


gumrāh kah ke pahle jo mujh se ḳhafā hue
āḳhir vo mere naqsh-e-qadam par fidā hue

ab tak to zindagī se ta.āruf na thā koī
tum se mile to ziist se bhī āshnā hue

aisā nahīñ ki dil hī muqābil nahīñ rahā
tīr-e-nigāh-e-nāz bhī aksar ḳhatā hue

merī nazar ne tum ko jamāl-e-āshnā kiyā
mujh ko duā.eñ do ki tum ik ā.īna hue

kyā hogā is se baḌh ke koī rabt-e-bāhamī
manzil hamārī vo to ham un kā patā hue

ab kyā batā.eñ kis kī nigāhoñ kī den thī
vo mai ki jis ke piite hī ham pārsā hue

suntā huuñ ik maqām-e-ziyārat hai aaj kal
vo zindagī kā moḌ jahāñ ham judā hue

vo aa ga.e davā-e-ġham-e-jāñ liye hue
lo aaj ham bhī qā.il-e-dast-e-duā hue

kab zindagī ne ham ko navāzā nahīñ 'hafīz'
kab ham pe bāb-e-lutf-o-ināyāt na vā hue

gumrah kah ke pahle jo mujh se KHafa hue
aaKHir wo mere naqsh-e-qadam par fida hue

ab tak to zindagi se taaruf na tha koi
tum se mile to zist se bhi aashna hue

aisa nahin ki dil hi muqabil nahin raha
tir-e-nigah-e-naz bhi aksar KHata hue

meri nazar ne tum ko jamal-e-ashna kiya
mujh ko duaen do ki tum ek aaina hue

kya hoga is se baDh ke koi rabt-e-bahami
manzil hamari wo to hum un ka pata hue

ab kya bataen kis ki nigahon ki den thi
wo mai ki jis ke pite hi hum parsa hue

sunta hun ek maqam-e-ziyarat hai aaj kal
wo zindagi ka moD jahan hum juda hue

wo aa gae dawa-e-gham-e-jaan liye hue
lo aaj hum bhi qail-e-dast-e-dua hue

kab zindagi ne hum ko nawaza nahin 'hafiz'
kab hum pe bab-e-lutf-o-inayat na wa hue


Source: Book : Safeer-e-shar-e-dil (Pg. 99) Author : Hafeez Banarsi Publication : Hafeez Banarsi (2007) Edition : 2007

Leave a comment

+