ḳhalish-o-soz dil-figār hī dī
dil meñ shamshīr āb-dār hī dī

bevafā se muāmle ke liye
ik tabī.at vafā-shi.ār hī dī

kaifiyat dil kī byaan karne ko
ek āvāz dil-figār hī dī

ḳhaar ko to zabān-e-gul baḳhshī
gul ko lekin zabān-e-ḳhār hī dī

dil shab-e-zinda-dār ham ko diyā
husn ko chashm-e-pur-ḳhumār hī dī

ḳhud raqīboñ ke vāste maiñ ne
zulf ma.ashūq kī sañvār hī dī

kyā nasheb-o-farāz thī 'tanvīr'
zindagī aap ne guzār hī dī

KHalish-o-soz dil-figar hi di
dil mein shamshir aab-dar hi di

bewafa se muamle ke liye
ek tabiat wafa-shiar hi di

kaifiyat dil ki byan karne ko
ek aawaz dil-figar hi di

KHar ko to zaban-e-gul baKHshi
gul ko lekin zaban-e-KHar hi di

dil shab-e-zinda-dar hum ko diya
husn ko chashm-e-pur-KHumar hi di

KHud raqibon ke waste main ne
zulf mashuq ki sanwar hi di

kya nasheb-o-faraaz thi 'tanwir'
zindagi aap ne guzar hi di