kam purānā bahut nayā thā firāq
ik ajab ramz-āshnā thā firāq

duur vo kab huā nigāhoñ se
dhaḌkanoñ meñ basā huā hai firāq

shām-e-ġham ke sulagte sahrā meñ
ik umañDtī huī ghaTā thā firāq

amn thā pyaar thā mohabbat thā
rañg thā nuur thā navā thā firāq

fāsle nafratoñ ke miT jaa.eñ
pyaar hī pyaar sochtā thā firāq

ham se rañj-o-alam ke māroñ ko
kis mohabbat se dekhtā thā firāq

ishq insāniyat se thā us ko
har ta.assub se māvarā thā firāq

kam purana bahut naya tha firaq
ek ajab ramz-ashna tha firaq

dur wo kab hua nigahon se
dhaDkanon mein basa hua hai firaq

sham-e-gham ke sulagte sahra mein
ek umanDti hui ghaTa tha firaq

amn tha pyar tha mohabbat tha
rang tha nur tha nawa tha firaq

fasle nafraton ke miT jaen
pyar hi pyar sochta tha firaq

hum se ranj-o-alam ke maron ko
kis mohabbat se dekhta tha firaq

ishq insaniyat se tha us ko
har tassub se mawara tha firaq

Source: Book : Kulliyat-e-Habib Jalib (Pg. 328) Author : Habib Jalib Publication : Tahir Sons Publishers (2012) Edition : 2012