'mīr'-o-'ġhālib' bane 'yagānā' bane
aadmī ai ḳhudā ḳhudā na bane

maut kī dastaras meñ kab se haiñ
zindagī kā koī bahāna bane

apnā shāyad yahī thā jurm ai dost
bā-vafā ban ke be-vafā na bane

ham pe ik e'tirāz ye bhī hai
be-navā ho ke be-navā na bane

ye bhī apnā qusūr kyā kam hai
kisī qātil ke ham-navā na bane

kyā gila sañg-dil zamāne kā
āshnā hī jab āshnā na bane

chhoḌ kar us galī ko ai 'jālib'
ik haqīqat se ham fasāna bane

'mir'-o-'ghaalib' bane 'yagana' bane
aadmi ai KHuda KHuda na bane

maut ki dastaras mein kab se hain
zindagi ka koi bahana bane

apna shayad yahi tha jurm ai dost
ba-wafa ban ke be-wafa na bane

hum pe ek e'tiraaz ye bhi hai
be-nawa ho ke be-nawa na bane

ye bhi apna qusur kya kam hai
kisi qatil ke ham-nawa na bane

kya gila sang-dil zamane ka
aashna hi jab aashna na bane

chhoD kar us gali ko ai 'jalib'
ek haqiqat se hum fasana bane

Source: Book : Kulliyat-e-Habib Jalib (Pg. 288) Author : Habib Jalib Publication : Tahir Sons Publishers (2012) Edition : 2012