'faiz' aur 'faiz' kā ġham bhūlne vaalā hai kahīñ
maut ye terā sitam bhūlne vaalā hai kahīñ

ham se jis vaqt ne vo shāh-e-suḳhan chhīn liyā
ham ko vo vaqt-e-alam bhūlne vaalā hai kahīñ

tire ashk aur bhī chamkā.eñgī yādeñ us kī
ham ko vo dīda-e-nam bhūlne vaalā hai kahīñ

kabhī zindāñ meñ kabhī duur vatan se ai dost
jo kiyā us ne raqam bhūlne vaalā hai kahīñ

āḳhirī baar use dekh na paa.e 'jālib'
ye muqaddar kā sitam bhūlne vaalā hai kahīñ

'faiz' aur 'faiz' ka gham bhulne wala hai kahin
maut ye tera sitam bhulne wala hai kahin

hum se jis waqt ne wo shah-e-suKHan chhin liya
hum ko wo waqt-e-alam bhulne wala hai kahin

tere ashk aur bhi chamkaengi yaaden us ki
hum ko wo dida-e-nam bhulne wala hai kahin

kabhi zindan mein kabhi dur watan se ai dost
jo kiya us ne raqam bhulne wala hai kahin

aaKHiri bar use dekh na pae 'jalib'
ye muqaddar ka sitam bhulne wala hai kahin