aur sab bhuul ga.e harf-e-sadāqat likhnā
rah gayā kaam hamārā hī baġhāvat likhnā

laakh kahte raheñ zulmat ko na zulmat likhnā
ham ne sīkhā nahīñ pyāre ba-ijāzat likhnā

na sile kī na satā.ish kī tamannā ham ko
haq meñ logoñ ke hamārī to hai aadat likhnā

ham ne jo bhuul ke bhī shah kā qasīda na likhā
shāyad aayā isī ḳhūbī kī badaulat likhnā

is se baḌh kar mirī tahsīn bhalā kyā hogī
paḌh ke nā-ḳhush haiñ mirā sāhab-e-sarvat likhnā

dahr ke ġham se huā rabt to ham bhuul ga.e
sarv qāmat ko javānī ko qayāmat likhnā

kuchh bhī kahte haiñ kahīñ shah ke musāhib 'jālib'
rañg rakhnā yahī apnā isī sūrat likhnā

aur sab bhul gae harf-e-sadaqat likhna
rah gaya kaam hamara hi baghawat likhna

lakh kahte rahen zulmat ko na zulmat likhna
hum ne sikha nahin pyare ba-ijazat likhna

na sile ki na sataish ki tamanna hum ko
haq mein logon ke hamari to hai aadat likhna

hum ne jo bhul ke bhi shah ka qasida na likha
shayad aaya isi KHubi ki badaulat likhna

is se baDh kar meri tahsin bhala kya hogi
paDh ke na-KHush hain mera sahab-e-sarwat likhna

dahr ke gham se hua rabt to hum bhul gae
sarw qamat ko jawani ko qayamat likhna

kuchh bhi kahte hain kahin shah ke musahib 'jalib'
rang rakhna yahi apna isi surat likhna

Source: Book : kulliyat-e-habib jaalib (Pg. 348)