حوصلہ وجہ تپش ہائے دل و جاں نہ ہوا
شعلۂ شمع تری بزم میں رقصاں نہ ہوا

حسن تھا مست ازل جام انا لیلیٰ سے
تن کی عریانی سے مجنوں کوئی عریاں نہ ہوا

لب منصور سے دی کس نے انا الحق کی صدا
تو اگر پردۂ پندار میں پنہاں نہ ہوا

ہم رہے چشم عنایت سے ہمیشہ محروم
دل نشیں تیر نظر کا کوئی پیکاں نہ ہوا

چشم جاناں میں سماتے ہیں سمانے والے
موت سے آنکھ لڑانا کوئی آساں نہ ہوا

دل ہے بت خانۂ اصنام خیالی ساحرؔ
تو وہ کافر ہے کہ بھولے سے مسلماں نہ ہوا