duniyā ko rū-shanās-e-haqīqat na kar sake
ham jitnā chāhte the mohabbat na kar sake

sāmān-e-gul-faroshī-e-rāhat na kar sake
rāhat ko ham sharīk-e-mohabbat na kar sake

yuuñ kasrat-e-jamāl ne luuTī matā-e-dīd
taskīn-e-tishna-kāmī-e-hairat na kar sake

ab ishq-e-ḳhām-kār hī armāñ ko de javāb
ham un ko be-qarār-e-mohabbat na kar sake

be-mehriyoñ se kaam rahā go tamām-umr
be-mehriyoñ ko sahne kī aadat na kar sake

kuchh aisī iltifāt-numā thī nigāh-e-dost
hote rahe tabāh shikāyat na kar sake

nākāmiyāñ to farz adā apnā kar ga.iiñ
ham haiñ ki e'tirāf-e-hazīmat na kar sake

faḳhr-e-munāsibat meñ tirā naam le liyā
ham ḳhud hī pardā-dārī-e-ulfat na kar sake

har-chand hāl-e-dīda-o-dil ham kahā kiye
tashrīh-e-kaifiyāt-e-mohabbat na kar sake

aflāk par to ham ne banā.īñ hazār-hā
ta.amīr koī dahr meñ jannat na kar sake

hamsā.egī-e-zāhid-e-bad-ḳhū ke ḳhauf se
parvardigār terī ibādat na kar sake

duniya ko ru-shanas-e-haqiqat na kar sake
hum jitna chahte the mohabbat na kar sake

saman-e-gul-faroshi-e-rahat na kar sake
rahat ko hum sharik-e-mohabbat na kar sake

yun kasrat-e-jamal ne luTi mata-e-did
taskin-e-tishna-kaami-e-hairat na kar sake

ab ishq-e-KHam-kar hi arman ko de jawab
hum un ko be-qarar-e-mohabbat na kar sake

be-mehriyon se kaam raha go tamam-umr
be-mehriyon ko sahne ki aadat na kar sake

kuchh aisi iltifat-numa thi nigah-e-dost
hote rahe tabah shikayat na kar sake

nakaamiyan to farz ada apna kar gain
hum hain ki e'tiraf-e-hazimat na kar sake

faKHr-e-munasibat mein tera nam le liya
hum KHud hi parda-dari-e-ulfat na kar sake

har-chand haal-e-dida-o-dil hum kaha kiye
tashrih-e-kaifiyat-e-mohabbat na kar sake

aflak par to hum ne banain hazar-ha
tamir koi dahr mein jannat na kar sake

hamsaegi-e-zahid-e-bad-KHu ke KHauf se
parwardigar teri ibaadat na kar sake

Source: Jalwa-e-sab rang