naved-e-āmad-e-fasl-e-bahār bhī to nahīñ
ye be-dilī hai ki ab intizār bhī to nahīñ

jo bhuul jaa.e koī shaġhl-e-jām-o-mīnā meñ
ġham-e-habīb ġham-e-rozgār bhī to nahīñ

marīz-e-bāda-e-ishrat ye ik jahāñ kyuuñ hai
surūr-e-bāda ba-qadr-e-ḳhumār bhī to nahīñ

matā-e-sabr-o-sukūñ jis ne dil se chhīn liyā
vo dil-navāz adā-āshkār bhī to nahīñ

qafas meñ jī mirā lag to nahīñ gayā hamdam
ki ab vo nāla-e-be-iḳhtiyār bhī to nahīñ

hai ain vasl meñ bhī pur-ḳharosh-e-parvāna
sukūn-e-qalb ba-āġhosh-e-yār bhī to nahīñ

nigāh-e-nāz ki be-gāna-e-mohabbat hai
sitam to ye hai ki be-gāna-vār bhī to nahīñ

vo ek rahbar-e-nādāñ ki jis ko ishq kaheñ
Dubo ke kashtī-e-dil sharmsār bhī to nahīñ

junūñ ko dars-e-amal de ke kyā kare koī
ba-qadr-e-hausla-e-dil bahār bhī to nahīñ

nawed-e-amad-e-fasl-e-bahaar bhi to nahin
ye be-dili hai ki ab intizar bhi to nahin

jo bhul jae koi shaghl-e-jam-o-mina mein
gham-e-habib gham-e-rozgar bhi to nahin

mariz-e-baada-e-ishrat ye ek jahan kyun hai
surur-e-baada ba-qadr-e-KHumar bhi to nahin

mata-e-sabr-o-sukun jis ne dil se chhin liya
wo dil-nawaz ada-ashkar bhi to nahin

qafas mein ji mera lag to nahin gaya hamdam
ki ab wo nala-e-be-iKHtiyar bhi to nahin

hai ain wasl mein bhi pur-KHarosh-e-parwana
sukun-e-qalb ba-aghosh-e-yar bhi to nahin

nigah-e-naz ki be-gana-e-mohabbat hai
sitam to ye hai ki be-gana-war bhi to nahin

wo ek rahbar-e-nadan ki jis ko ishq kahen
Dubo ke kashti-e-dil sharmsar bhi to nahin

junun ko dars-e-amal de ke kya kare koi
ba-qadr-e-hausla-e-dil bahaar bhi to nahin

Source: Jalwa-e-sab rang