Subscribe to our newsletter and get our newest updates

Yasmeen Hameed

  • Ghazal


ek ek harf sameTo mujhe tahrir karo


ek ik harf sameTo mujhe tahrīr karo
mirī yaksūī ko āmada-e-zanjīr karo

sab ḳhad-o-ḳhāl mire dhund hue jaate haiñ
sub.h ke rañg se aao mujhe tasvīr karo

jītnā mere liye karb huā jaatā hai
mere pindār ko toḌo mujhe tasḳhīr karo

us imārat ko girā do jo nazar aatī hai
mire andar jo khañDar hai use ta.amīr karo

ab mirī aañkh se le lo ḳhalish-e-bīnā.ī
yā mire ḳhvāb ko sharminda-e-ta.abīr karo

ek ek harf sameTo mujhe tahrir karo
meri yaksui ko aamada-e-zanjir karo

sab KHad-o-KHal mere dhund hue jate hain
subh ke rang se aao mujhe taswir karo

jitna mere liye karb hua jata hai
mere pindar ko toDo mujhe tasKHir karo

us imarat ko gira do jo nazar aati hai
mere andar jo khanDar hai use tamir karo

ab meri aankh se le lo KHalish-e-binai
ya mere KHwab ko sharminda-e-tabir karo


Source: Book : Beesveen Sadi Ki Behtareen Ishqiya Ghazlen (Pg. 223)

Leave a comment

+